مرتضى منصور: حال وحيدة لإلغاء قرار اعتذار الزمالك عن المشاركة في «السوبر»
كشف مرتضى منصور رئيس مجلس إدارة نادى الزمالك عن حالة واحدة يتم فيها إلغاء قرار الاعتذار عن المشاركة فى مباراة السوبر أمام الأهلى يوم 5 أبريل المقبل.
أضاف منصور خلال تصريحات تلفزيونية:"لو طلع قرار بكرة بوقف كهربا مستعدين نسافر، لأننا مش خايفين من حد، وكهربا ده لعب ماتش صن داونز والأهلي اتغلب خمسة، ولعب قدامنا في السوبر واتغلب".
تابع:"أخذنا القرار الصح اللى بيحافظ على كرامة النادي،و بيقولوا فيه مخالفات في النادي، هو فيه فلوس علشان يكون عندنا مخالفات احنا عاملين نجيب شوية من هنا وشوية من هنا".
الموضوع متعلق بالكرامة وقيمة العدل
وواصل:"القصة مش في لاعب، الموضوع متعلق بالكرامة وقيمة العدل، واللى بيحصل مش عدل، والموضوع زاد عن حده".
وأكمل:"اللى الناس متعرفوش ممدوح عباس ومحاميه وكهربا والخطيب راحو لرئيس مصلحة الضرائب قالوله افتحوا الحجز على حساب الزمالك ساعة بس ممدوح عباس يسحب فلوسه اللى في حساب الزمالك، والخطيب يحط غرامة كهربا والضرائب تاخد المتأخرات بتاعتها".
واستطرد:"اديني جايلك ياوزير الشباب والرياضة هنشوف هتعمل ايه، انت دعمت كل الأندية بفلوس ماعدا الزمالك، واحنا مش هنبهدل النادي علشانك، ومحدش في مجلس الإدارة فتح موضوع حد بديل لمرتضى".
مرتضى منصور: نعتذر إلى دولة الإمارات عن خوض لقاء الـ «سوبر»
واستكمل:"بنعتذر لدولة الإمارات على خوض لقاء السوبر وبقول للمسؤولين هناك إن العلاقات اللى بينا محترمة، إحنا ممكن نعمل مباراة في نفس الموعد بتاع السوبر المصري، بين بطل الدوري المصري وبطل الدوري الإماراتي".
تابع:"بقول للمسؤلين في دولة الإمارات أي وقت ادعونا هانيجى نعلب المباراة علشان الإمارات شعب محترم.. لكن احنا حاسين إننا متكتفين من اتحاد الكرة، ووزارة الشباب والرياضة واحنا منقبلش اننا نروح نلعب غصب عن إدارة النادي وجماهيره".
أضاف:"اتحاد الكوره اللي خسر كل البطولات داخل حرب مع الزمالك رغم ان عاملين نفسهم زملكاويه جمال علام وبركات وحازم عاملين نفسهم زملكاويه".
الموضوع مش كهربا بس.. ولكن الموضوع بدأ من وقف القيد
وواصل:"الموضوع مش كهربا بس ولكن الموضوع بدأ من ايقاف القيد وانا رايح اتحايل عليهم وهما بعنجهيه بيرفضوا، انت معين مش منتخب عشان تعمل معانا كده وتحرمنا من لاعبين مؤثرين في افريقيا والدوري".
تابع:"وبعدين الاهلي يقولي لجنه الانضباط مش قانونيه، امال روحت اشتكتني ليه قصادها يا محمود يا خطيب ولا هو اي كلام وخلاص".
أضاف:"وبعدين انت جايبلي حكام مصريين، هو اي المهزله دي يا جماعه عاوزين تعملوا زي حكام السله وتطرد الولد وهو مش شايف الخط".
استكمل:"احنا اتخذنا القرار ومفيش رجعه فيه واحنا ما دام دخلنا حرب نكملها وانا قولت ما دام نزلت الملعب منسحبش".
مرتضى منصور: نعتذر إلى كل جمهور الزمالك وأهل الإمارات
وأردف:"وبعدين في صحفي قال ان جمال علام اتصل بالخطيب وقاله متقلقش احنا عقوبه كهربا مش هنفذها الا بعد السوبر وهنقلل العقوبه من ١٢ ل ٦، هو احنا هنقعد ساكتين كمجلس اداره".
واختتم:"بعدين كل الضغوط اللي بتمارس عليا اننا هنحل المجلس، وهنبعت لجان تفتيش، انا بقعد اضحك على الكلام ده..احنا بنعتذر لكل جمهور الزمالك واهل الامارات اللي قطعوا تذاكر، اتحاد الكوره هو اللي بوظ الدنيا".
